Notes

Sa hilagang bahagi ng Mindanao, sa P-7 Brgy. 19 Buhangin sa Lungsod ng Butuan, isang maningning na paglalakbay ang nagsimula noong Disyembre 27, 2001, kung kailan ako'y isinilang sa maganda at matiwasay na pook. Ako si Jhereda C. Pascual, isang tahimik na dilag, 22 taong gulang. Isang estudyante na kasalukuyang kumukuha ng kursong BSED FIL, isang kurso na may layuning mapalalim ang kasanayan sa Filipino, maging sa gramatika at panitikan nang sa ganon ay maging epektibong tagapagturo balang araw. Ang aking pag-usbong ay diwa ng matamis na pagmamahalan nina Gng. Rowena Pascual at G. Rolando Pascual Jr., ang mga nagsisikap na nagsanay sa akin sa paglakad ng unang hakbang sa palasyo ng buhay. Sila ang nagbigay ng buhay sa aking pagtahak sa mundong ito, at ang bawat gabay at inspirasyon nila ay siyang nagbigay-kakulay sa akda ng aking pag-iral.

Isa sa kaaya-aya kong talento ay ang pagiging tahimik. Masaya akong may kasama o kausap pero mas gusto kong nag-iisa, yung pakiramdam na ayaw ko ng nakikilala ako ng ibang tao hahaha. Bilang isang tahimik na dilag, masaya akong nag-iisa dahil para sa akin ang pag-iisa ay tila isang palabas ng teatro kung saan ako ang nagiging bida, isang indibidwal na masigla sa pagbuo ng sariling awitin. Sa gitna ng katahimikan, nahanap ko ang kahulugan ng aking pag-iral, at ito'y naging daan sa pag-unlad ng aking kakayahan at pagkakakilanlan. Ang pag-aaral ay naging isang pangunahing bahagi ng aking paglalakbay. Sa mga silid-aralan, ako'y nagsisilbing manlalakbay sa kaharian ng kaalaman. Ang mga guro ay nagsilbing mga tagapayo na nagbukas sa akin ng mga pintuan patungo sa mas malawak na pag-unawa. Ang aking pagsusumikap sa pag-aaral ay tila isang pagtugon sa kahilingang maging isang magaling at epektibong tagapagturo balang araw. Higit sa lahat, ang musika ay naging kasangkapan ng aking pag-usbong. Ang mga nota at awit ay tila mga kaibigan na kasabay ko sa bawat galak at lungkot ng aking buhay. Mahalaga ang musika sa aking buhay sapagkat ito'y nagsisilbing inspirasyon at kasangga sa bawat yugto ng aking paglalakbay.

Sa pagtatapos ng bawat araw, ako'y nagbabalik-loob sa puso ng Buhangin, sa P-7 Brgy. 19, kung saan nag-ugat ang aking pagkakakilanlan. Isang musikal na paglalakbay ang tatahakin ko patungo sa mas malawak na mundo. Ako si Jhereda C. Pascual, isang tahimik na dilag na masigla sa pagtahak sa landas ng buhay, isang 22-anyos na estudyante na handang ipagpatuloy ang pag-awit ng sariling melodiya ng buhay.