Notes

السلام عليكم ورحمة اللة وبركاته

حبيت اتكلم عن لعبة كنت من اكبر منتظرينها ولكن للاسف...

هذي اللعبة اسمها فاينل فانتسي فيرسيس ١٣، لعبة الاكشن ار بي جي من شركة سكوير اينكس، و تعتبر جزء جانبي في سلسلة فاينل فانتسي، وتم الاعلان عنها في سنة ٢٠٠٦ وكانت راح تكون حصرية على جهاز البليستيشن ٣.

قصة اللعبة مستوحاة من رواية ويليم شيكسبير "روميو و جولييت" وكان لها جو حيل مظلم، حزين و كئيب مثل ما ورونا في اول دعاية لها.

بعد سنتين من الغياب، في ٢٠٠٨ نزلت لها ثاني دعاية و كانت مكملة للدعاية الاولى، وعرفنا منها كل اعضاء الفريق اللي كانوا يشتغلون على اللعبة، و الصراحة كان فريق جبار وكلهم اشتغلوا على اقوى اجزاء فاينل فانتسي و ايضا اشتغلوا على سلسلة كينق دوم هارتس، و من هني الحماس زاد اكثر واكثر، بس بعد غيبة ثانية لمدة ثلاث سنين بدا الحماس يقل.. و قام الكل يشك اذا المشروع اصلا حقيقي.

في ٢٠١١ ثالث دعاية للعبة انعرضت وكانت انفجارية، ورونا فيها طريقة اللعب وجزء من افتتاحية اللعبة وكانت شي خيالي في وقتها، من التصوير والموسيقى والاحداث والمخرج بنفسه قال انهم انتهوا من كاتبة القصة وبقى جزء البرمجة.. بس بعد غيبة ثالثة لمدة سنتين كانت هذي بداية الكارثة.

تبين ان الفريق كان يعاني مشاكل في برمجة اللعبة بسبب محرك اللعبة و ضعف قوة الاجهزة في وقتها، فقررت الشركة انها تشتغل على محرك يديد للعبة وتنتظر الجيل اليديد من الاجهزة، وطبعا هذا اخذ منهم وقت ومصاريف كبيرة، و في ٢٠١٣ تم الاعلان عن اللعبة للمرة الثانية باسم فاينل فانتسي ١٥، ورجعوا في تعديل و كتابة القصة علشان تكون حق ثلاث اجزاء، وسبب تغيير الاسم كان لان المشروع صار حيل كبير ومختلف عن القديم وكان شي صعب ان يكون جزء جانبي، ومن هني بدا التغير الكبير في المشروع.

وبعد سنة ونص تقريبا في ٢٠١٤ طلع خبر غريب ان الفريق اللي كان يشتغل على المشروع تغير كليا، من المخرج الى الكاتب وغيرهم، وهذا كان شي حيل غريب لانهم استبدلوهم ابفريق جدا عادي في الشركة، وكان كل شغلهم على الاجهزة المحمولة فقط وماعندهم اي خبرة في العاب بهذا الحجم، ورجع الفريق اليديد لكتابة القصة للمرة الثالثة واختصرها الى قصة حق لعبة وحده، وهذا اثر حيل عالقصة والناتج من هذا ايضا انهم فصلوا المشروع الى فلم، اللي المفروض يكون افتتاحية اللعبة مثل ما ورونا في عرض ٢٠١١ و الى انيمي اللي المفروض يكون شي اساسي في اللعب اصلا لانه يشرح ماضي الشخصيات وعلاقتهم بين بعض، والى وايد اشياء ما كان لها داعي غير انها تختصر الموضوع والوقت وايضا كانت مستهدفة شريحة اكبر من الناس ومع كل هذا كانت طريقة ربطهم للعبة الاساسية جدا ضعيفة و القصة في اللعبة كان تقديمها جدا مختصر وغير كامل، وهذا الشي كان حيل ملاحظ اذا كنت تهتم حق القصص بشكل عام وخاصة اذا كنت من عشاق سلسلة فاينل فانتسي.

وبعد سنة في معرض اي ثري لسنة ٢٠١٥ صدم الكل مع الاعلان عن ريميك لفاينل فانتسي ٧، وتبين ان فريق الريميك اهو نفس فريق اللي كان يشتغل على فيرسيس ١٣، فشنو نستنتج من كل هذا؟

استنتجت ان الفريق الاصلي فقدوا الامل في المشروع، والشركة بدال ما تكنسل المشروع وتضيع عليهم كل السنين والمصاريف، قرروا ان يخلون الفريق المبتدئ يكتس خبرات وينزل اللعبة باسرع وقت مستهدفة اكبر شريحة من اللاعبين وحولوا تركيز الفريق القديم الى مشروع يديد حق انجح ومن اهم الالعاب في تاريخ القيمز، فاينل فانتسي ٧ ريميك، اللي راح يكون عبارة عن اكثر من جزء وكل جزء بحجم لعبة كاملة.

هذي اهي السالفة باختصار، وطبعا في اشياء وايد ما ذكرتها مثل مشلكة فاينل فانتسي١٣ و ١٤ وشلون هالعبتين عطلوا وايد مشاريع في الشركة, ومشكلة محركات الالعاب الخاصة للشركة اللي ضيعت وايد من وقتهم واثرت على العابهم، وكمية الاشياء المحذوفة من ١٥.

فقولولي شنو رايكم في فاينل فانتسي ١٥؟، هل تحس انها ناقصة وفيها مشاكل؟ انا عن نفسي اشوف العيوب اللي في اللعبة اكثر من ميزاتها ابوايد وخاصة في القصة.