Ami ket maeng nglamun-nglamunan terus mari entuk SMS tekok Nina. Lha yok opo gak kate nglamun wong Nina ngandhani nek katene onok lreuni SMA rong minggu engkas?"Reuni???" Batine Ami. "Ketemu Janoko neh???"Nek melok carane wong ngenggres kono, Janoko iku "first love"-e Ami. Areke gak patio nggantheng tapi ancene simpatik ngunu. Ambek arek wedok sopan, gak kakehan polah wis pokoke... Wis ngunu pinter sisan!Jarene arek lebay, pokoke Ami wis"cintrong metong" ambek Janoko. Emoh noleh arek lanang liyane. Tapi akibate jan nggarai Ami pingin nangis gulung-gulung. Lha yok opo? Tibake Janoko malah pacaran ambek arek wedok tekok sekolahan liyane. Jenenge Vita. Areke ancen uayu puolll... Koyok peragawati ngunu wis tah modele!Lha Ami yo sadar diri seh, wong yo sering ngoco. Dapak’o body-ne meragawati, lha wong arek iku cuilik koyok kecenthet ngunu. Sakjane rupane yo gak elek, malah manis banget. Opo neh nek mesem utowo ngguyu. Nggemesno!Durung-durung Ami wis patah hati. Kompensasine, arek iku dadi sregep sinau. Munggah nang kelas 2 SMA iso entuk ranking 3. Padahal biasane mek puas ndek njobone 5 besar. Sampek akhire iso lulus SMA ambek nggondhol gelar ‘lulusan dengan nilai terbaik’. Sakjane yo hebat lho arek iku...Ami kaget pas hapene muni neh. Telepon tekok nomer sing gak dikenal. Tapi diterimo ae telepon iku, masiyo ambek raine rodok mencureng thithik.“Halo...”“Mi, iki bener awakmu tah?”Ami tambah mencureng krungu suorone wong lanang ndek seberang kono.“Iyo, sopo iki?”“Aku Janoko, Mi... Mosok lali ambek suaraku?”"Heee???" Ami meh semaput. "Janoko???"“Mi... Halo... Sori ngganggu.”“Lho, Ko, awakmu entuk nomer hapeku tekok endi?”“Dikandhani Nina. Gak popo seh? Yok opo kabarmu? Hebat awakmu saiki!”“Biasa ae seh, Ko. Hebat apane?”“Bu Dosen rek!”“Hehehe... Awakmu ndek endi saiki?”“Aku ndek Jakarta, Mi. Yok opo, awakmu kate teko reuni tah?”“Hm... Yok opo yo? Sakjane iso seh, wong pas wayahe minggu tenang iku reunine.”“Kangen awakmu aku, Mi...”“Heh? Gak gendheng tah awakmu kangen ambek aku? Ojobmu nek krungu opo gak digibeng kulit duren awakmu?”“Hahaha... Ojob endi?”“Lho... Sing iko? Sing koyok peragawati iko?”“Halaaah... Wis bubaran suwe. Jaman kuliah iko wis mlaku dhewe-dhewe.”“Ooo...”“Awakmu yok opo, Mi?”“Yok opo apane?”“Wis duwe cemewew tah?”Ami ngakak krungu Janoko niru istilahe Sule.“Lha ketoke yok opo, Ko? Hehehe...”“Yo wis pokoke ketemuan ndek reuni yo...”Ami gak njawab. Sik mikir suwe. Ambek nglamun-nglamuno Janoko thithik.* * *Soal Ami dadi sering nglamun semingguan iki, Herdi sadar banget. Tapi wong lanang iku gak nyoba takon opo-opo sik. Biasane yo Ami crito karepe dhewe. Bener, akhire Ami yo gak tahan.“Mas...”“Hm...”“Kok mek ‘hm...’ thok seh?”Herdi ngekek ndelok Ami rodok mecucu.“Ono opo to, Jeng?”Biyen, pertama kali ngomong ambek Herdi, Ami cik mindere setengah mati. Herdi iki wong asli Jogja masiyo rodok suwe urip ndek Jakarta. Omonge jan super alus. Lha ngerti dhewe Ami nek ngomong yo koyok ngunu iku, asli branjang kawat. Arema rek! Tapi Herdi gak tau repot ngurusi carane Ami ngomong. Wong iku jarene malah seneng ngrungokno Ami ngomong. Dadine Ami pancet setia ceplas-ceplos ambek logat Malangane. Sampek saiki.“Eling gak aku tau crito soal "first love"-ku?”“He em... Kenopo?”“Kapan iko nelpon aku. Ngajak teko reunian.”“Terus?”“Aku pingin teko ik, Mas... Guduk mergo pingin ketemu arek iku. Aku yo pingin ketemu arek-arek liyane.”“Tenane?” Herdi mesam-mesem.Ami mecucu neh, tapi gak iso ngomong opo-opo.“Yen pancene pingin ketemu, yo wis to budhal wae.”“Gak popo tah?”“Yo ora to... Ora opo-opo.”“Hm...,” Ami mesam-mesem dhewe.* * *Acara reuni iku mulaine jam 5 sore, tapi ket mari adus jam 3 awan Ami wis mulai dandan ayu. Dhek’e milih klambi batik tulis terusan werno abang boto sing ditukokno Herdi. Pas ambek kulite sing kuning semrining resik. Riasane gak medhok, tapi nggarai arek iku tuambah ayu. Rambute sing potongan cendhek di-"blow" rapi.Teko nang nggone reuni, konco-koncone wis akeh sing podho methungul. Ketemu konco-konco hahahihi jaman enom, Ami male dadi lali-lali thithik ambek deg-degane katene ketemu Janoko. Arek iku justru sibuk ngakak kiwo-tengen ambek konco-konco liyane. Sampek akhire...“Mi!”Ami noleh krungu Nina nyeluk dhek’e. Ndek sebelahe Nina onok arek lanang kocomotoan kuru dhuwur. Moro-moro Ami rodok ndredheg. Dhek’e noleh nang arah liyo. Ketemu ambek sing digoleki. Sing digoleki lagi ngawasi Ami ambek mesam-mesem. Ami ngawe wong iku.“Jancik! Awakmu kok male dadi uayu temen seh, Mi?”Arek lanang sing ndek sebelahe Nina ketok "surprise" ngunu ketemu Ami neh.“Halo, Ko! Yok opo kabare?” Ami ngajak salaman.“Yo ngene iki. Awakmu dhewekan tah, Mi?”Ami gedheg. Pas iku wong lanang sing teko ambek dhek’e wis nyedhek. Ami nggamit tangane wong iku.“Gak. Aku teko ambek iki, tunanganku.”Herdi sing ket maeng wis mesam-mesem dadi tambah ombo meseme.“Lho, Pak...,” Janoko mlongo ndelok sopo sing teko ambek Ami, sing diaku tunangan ambek Ami.“Apa kabar, Ko?” Herdi ngajak salaman.“Eh... Baik, Pak,” Janoko ketok rodok glagepan mergo salah tingkah.“Lho! Wis kenal tah?” Nina gantian nduding Janoko ambek Herdi.“Sampun, Mbak,” Herdi manthuk.“Pak Herdi biyen atasanku sakdurunge pindah nyekel kantor Jogja,” Janoko nyengir.“Ealaaah...,” Nina manthuk-manthuk.“Maaf, Pak, saya nggak tahu kalau Ami tunangan Bapak,” Janoko ketok isin.Herdi mesem. “Ndak apa-apa. Ya sudah, silakan ngobrol dulu. Saya mau icip-icip makanan dulu. Kelihatannya kok enak-enak. Mbak Nina mau temani saya?”Nina langsung manthuk. Sakdurunge ninggal Ami ambek Janoko, Herdi sempat ngedipno sebelah mripate nang Ami. Ami mek nyengir.“Lha... saiki wis ngerti tah jawabane?” Ami setengah nyindir.Janoko ngekek. Ketoke yo rodok gelo ngerti Ami wis duwe tunangan.“Lha opo’o lho gak biyen-biyen?” Ami nguber terus.“Embuh, Mi...,” Janoko kukur-kukur bathuk. “Aku ancene telmi. Aku sakjane ngerti nek awakmu seneng ambek aku. Tapi tak’pikir gak popo nek aku pacaran sik ambek arek liyo. Pikirku awakmu sik gelem ngenteni.”“Yo iku salahmu, ke-PD-en,” Ami ngguyu. “Mari awakmu pacaran ambek arek koyok peragawati iko aku wis gak mikir awakmu neh. Tak’pikir gawe opo? Arek koyok awakmu gampang nemu arek wedok liyane. Mangkane aku ngotot golek nilai lebih jarno aku gak diremehno wong liyo. Ndilalahe ketemu Mas Herdi. Gelem nrimo aku opo onoke aku. Ngregani aku sak’sembarange.”“Pantes wis awakmu entuk Pak Herdi,” Janoko mesem kepekso. “Apik kok wonge. Hebat! Umur sakmono wis dipecoyo nyekel kantor Jogja. Maju pisan!”Ami ndelok Herdi sing lagi asyik ngemil karo ngobrol ambek Nina. Ketoke tambah gayeng opo maneh bojone Nina melok gabung.Njero ati arek wedok iku kisinan dhewe."Lha laopo aku kathik ndredheg-ndredheg barang katene ketemu Janoko? Nyatane, tibake mek nggluuuethek gak onok roso opo-opo neh!"Be’e nek Herdi nglarang dhek’e teko reuni, rasane malah penasaran ae soal ketemuan ambek Janoko. Tapi lak nyatane Herdi sendiko dhawuh ambek karepe Ami teko reunian.Saiki, baru Ami bener-bener yakin nek pilihane gak salah. Herdi mesem tekok kadohan. Ami bales mesem. Ndek mripate, mak bedunduk Herdi sing ancene nggantheng iku dadi ketok ping sewu luwih nggantheng.* * * * *
