Notes

title: Hiraya
Ang buhay nating mga tao ay nabubuo mula sa ating mga munting pangarap at imahinasyon. Mga munting pangarap na unti-unting lumalawak at nagkakaroon ng mga hugis, kulay, buhay, direksyon at katuparan para sa ating hinaharap. Wala itong limitasyon sapagkat nangangarap ka at walang kasing ganda ang bumuo ng pangarap sa buhay. Dahil sa lawak ng ating mga imahinasyon minsan ay nangangarp na rin tayo ng mga bagay at pangyayari na wala na halos sa reyalidad at katotohanan. Ngunit mangarap ka lang dahil ang pagkakaroon ng pangarap ay walang pinipiling edad at estado sa buhay.

Mahalaga ang ating mga pangarap dahil dito rin tayo nag sisimula na matuto sa buhay. Mayroon na mga pangarap na kahit abot kamay mo na ay kailangan mong bitawan para sa ikabubuti, pero ang kapalit naman nito ay mas maganda pa sa binitawan at sinakrapisyo mo. Sa ganitong pagkakataon dapat huwag tayong mawalan ng pag-asa bagkus ay gumawa ulit tayo ng panibago at mas malawak na pangarap. Kasi ang ating buhay ay sadyang mapagbiro at mapaglaro, parang isang gulong lang ito minsan nasa itaas, minsan nasa ibaba. Sabi nga ng iba kung hindi ukol ay hindi bubukol.

Huwag kang magpadala sa mga taong walang bilib sayo, kahit sabihin nilang imposible ang mga pangarap mo. Patunayan mong mali sila at kaya mo ito higit pa sa iniisip mo. Kaya ikaw, kung naabot mo na mga pangarap mo sa buhay huwag mo sanang ipagyabang sa maling paraan. Kasi pag yan ay muling gumuho babalik ka sa umpisa at ikaw ang pagtatawanan. Matutong lumingon sa pinanggalingan o sinimulan. Kung hindi dahil sa mga nakaraan, wala ka ngayon sa iyong kinatatayuan o kinalalagyan mo sa buhay.