Notes

بســـم الله الرحمــن الرحــــيم
....................................................................................................................................................................
إنســــان جديــــــد

قررت خلاص انى اكون احسن فى اللى جاى واكتفى جداً باللى راح منى واللى ياما كنت مقصر فيه وباختصار تفسيرى لاسباب فشلى فى ايامى اللى فاتت كان بعدى عن ربنا .. لما بعدت عن ربنا بعدت عنى كل حاجة حلوة .. بعد عنى الضحك اللى بجد .. بعد عنى حب الناس .. بعد عنى تقديرى لذاتى .. باختصار بعدت عنى السعادة .. وبعد حوالى سنتين من البعد عن ربنا واللامبالاة المفرطة اللى وصلت لحد الاهمال والكسل الشديد قررت انى اكون انسان جديد .. انسان جديد ليه هدف فى حياته مش عايش مستسلم وماشى مع التيار زى ما يوديه .. انسان جديد بيعرف يحب ويتحب وعنده قلب ابيض مبيعرفش يكره حد .. انسان قريب جداً من ربنا ومبيستناش حاجه من حد الا من ربنا لانه هو الرزاق وهو الخالق اللى مبينساش عباده .. فقررت انى مع بداية السنة الجديدة 2016 اكون الانسان الجديد دا .. واول خطوة فى حياتى الجديدة هى التوبة والرجوع لربنا .. احساس وحش جدا بتحسه لما تكون بعيد عن ربنا مهما حسيت بفرحة بتحس برضو ان فيه حاجه من جواك خنقاك مش مخلياك تدوق الفرحة دى بجد وتقصيرك الشديد فى علاقتك مع ربنا بيخليك عايش فى دنيا مش دنيتك وعايش لهدف غير اللى ربنا خلقك عشانه .. ربنا لما خلقك خلقك عشان تعبده مش عشان تعيش اسير للحزن والهم وقالك فى القرآن ( ولا تهنوا ولا تحزنوا ) .. خلقك عشان تكون قريب منه ف يسعدك .. مش عشان تعيش بعيد عنه وتدور على السعاده الوهمية .. خلقك عشان فى عز احزانك واحتياجك تلجأله مش تسب وتلعن فى الظروف وتسخط على عيشتك .. ومن رحمة ربنا بينا انه بيقبل التوبة وبيغفر اللى فات بمجرد بس انك تعتذر وتقوله انا اسف مش هعمل كدا تانى .. ربنا مش زى البشر متتكسفش وانت رايحله ولا تفتكر انه هيرد ايدك او يكسفك هو اللى خالقك وهو اللى عارف قد ايه انت قلبك ابيض .. هو الوحيد اللى شايف اللى جواك وحاسس بيك اكتر ما انت حاسس بنفسك .. هو الوحيد اللى كان بيحس بيك لما كل الناس كانت ظلماك وانت ساكت .. هو الوحيد اللى كان عارف انك استحملت كتير وضاع منك حاجات كتير كنت بتحبها .. هو اللى عالم بالليالى اللى سهرتها من الهم اللى كان ساكن قلبك .. هو الوحيد اللى عالم بالليالى اللى عينك مغمضتش فيها من كتر التفكير والزعل اللى جواك .. هو الوحيد اللى كان معاك لما كنت اخد جمب وقاعد بعيد عن كل الناس ومش عايز تكلم حد .. هو اللى ارحم بيك من والدك ووالدتك .. هو اللى مهما عملت هيسامحك .. هو الوحيد اللى فى عز المحن كان جمبك ومش سايبك .. لكن .. للاسف فى وقت التوبة الشيطان بيحاول على قد ما يقدر انه ييأسك من رحمة ربنا ويخليك تفتكر ان ذنبك اكبر من رحمة الله وان ربك مش هيقبلك مهما عملت .. لكن فى الحقيقة كل دى وساوس وكل دى اهداف للشيطان من اول ما نزل ع الارض وهو هدفه اغواء البشرية وملء حياة بنى ادم بالحزن والهم .. طب ايه الحل عشان مستسلمش للوساوس دى وافضل بعيد عن ربنا .. الحل انك تروحله وتعتذرله هو اللى خلقك وهو اللى عالم بضعفك قدام شهواتك هو اصلاً اللى زرع فيك الشهوات دى عشان لما تغلط ترجعله وتتعلم انك تتعلق بيه مش عشان تعصيه بيها و قلبك يقسى وتبعد عنه .. وزى ما قال فى الحديث القدسى وهو بيكلمنى وبيكلمك ( يا ابن آدم لو بلغت ذنوبك عنان السماء واستغفرتنى غفرت لك ولا ابالى ) .. روحله وخلى عندك يقين انه هيقبلك وافتكر الجمله دى كويس جداً ( اللى سترك وانت بتعصيه مستحيل يرفضك لما ترجعله والا مكنش سترك من الاول ) المهم ادعى واحسن الظن بالله وثق تماماً انه هيقبل دعائك وزى ما قال سيد الرجال سيدنا محمد ( إن الله حيىٌ كريم يستحى ان يرفع عبده له يداه فيردهما صفراً خائبتين ) .. ولو اتاملت فى كلام ربنا هتحس بمدى حبه ليك ومدى رحمته بيك .. اللى انت مستحيتش منه وانت بتعصيه بيستحى منك وانت بتدعيه ..! وحتى لو بصيت بصة على الايام اللى كنت فيها بعيد جدا عنه هتلاقيه هو قريب جداً منك .. كان بيرزقك .. كان بيحفظك .. كان بيسهلك الصعب .. كان يحللك مشاكلك .. وياما عدت عليك مشاكل ومحن كنت فاكر انت انت اللى بتحلها بذكائك وفطنتك لكن فى الحقيقة ان ربنا كان واقف جمبك وقتها و بيقولك لو انت مخاصمنى وخلاص عايز تنسانى ف انا مش هينفع انساك ابداً لانى خلقتك ومينفعش اسيبك لوحدك فى الدنيا .. عارف الحزن اللى كان دايما ملازمك وانت بعيد عن ربنا دا فعلاً ابتلاء من ربنا لكن من رحمته بيك خلى الحزن دا يمحى ذنوبك زى ما قال رسولنا الكريم عليه الصلاة والسلام ( اذا كثرت ذنوب العبد ولم يكن له ما يكفرها ابتلاه الله بالحزن ليكفرها عنه ) .... ما أرحمك يا الله !