Notes

هل تقدر تعيش حياة عادية و مستقره و فاجأه بسبب حدث واحد بس حياتك تتغير 180 درجة ؟ هل هتعرف تعيش و تتأقلم ولا لأ ؟ و هل ياتري الشئ اللي ممكن حد يشوفة شر هل ممكن يشوفة بعدين خير ؟ و هل ممكن الخير يبقي شر اصلا ؟ انا حصلي كل ده عشان كده حابب اقول ليكم ان كل حاجة بتتغير و هتتغير! و صدقوني هتتغير لوحدها ! اه...انا مذكرتش مين انا,مع اني مش متأكد اني فعلا هكون عايز اني ارسل رسالتي للناس بس..انا متأكد انكم تقدروا تفهموني اكتر .
انا اسمي نور عائلتي بسيطة و صغيرة متكونة من بابا و ماما واختي جيهان وهي اصغر مني بسنة واحدة . بداية قصتي كانت في عمر ال 17 كنت بحلم بحلم غريب جدا , كنت بحلم براجل لابس لبس صعيدي و بيكون واقف امامي و بينادي علي اسمي (نور..نور..نور) كان الحلم ده بيتكرر معايا و بحلم بيه كل فترة لكن مكنتش بركز مع الحلم ده لان ده حلم عادي زي اي حلم ممكن يتكرر . مرت السنين و الحلم ده فضل يتكررلي برضو بين كل فترة و فترة لكن زي ما قلت اني مكنتش بحس ان ده شئ غريب , يعني كان عادي مجرد حلم و بيتكرر. انا برضو كان عندي ذكري وحشة مع يوم عيد ميلادي, انا عيد ميلادي يوم 1/1 في السنة اللي هو يوم راس السنة بس السئ في كل ده ان كل يوم عيد ميلاد يعدي عليا بيحصل فيه حاجة سيئة يعني في لما جاء عيد ميلادي ال 10 وقعت و يدي اتكسرت و في عيد ميلادي ال 15 عملنا حادث و ابويا دخل المستشفي لفترة بس الحمد لله تعافي بعده و كل سنة يحصللي حاجة سيئة و بقيت كل ما عيد ميلادي يقرب بكون مستني حاجة سيئة تحصل .
بعد مده خلصت ثانوية عامة و دخلت كلية تجارة زي معظم الناس و من هنا بدأت الاحداث . في يوم راس السنة رحت مع اصحابي عشان نحتفل بعيد ميلادي ال20 و كنت بدعي يعني ان اليوم ده يعدي علي خير , اليوم بصراحة مكانش سئ كعادتة , روحت للبيت متأخر , ضلمت الغرفة و رحت للسرير و فضلت ماسك التليفون شوية و فجأة سمعت صوت جاء من بره غرفتي و كان صوت زي ما يكون في حد بيتمشي بره الغرفة , بعدين انا مركزتش مع الصوت و قلت يمكن ماما او حد خرج الحمام , لكن بعدها حد بدأ يخبط علي باب غرفتي بخبطات منتظمة , قلت بعدها : ادخل , لقيت محدش دخل ف بعدها تكرر تاني صوت الخبط عالباب فقلت : ادخلي يا جيهان انا عارف انه انتي , بعدها فضل الباب يخبط تاني بخبطات منتظمة , فقلت : جيهان بطلي لعب الاطفال ده انا عايز انام , بس برضو فضل الباب بعدها يخبط تاني , ساعتها انا قمت من السرير و نورت فلاش التليفون و رحت عشان افتح الباب عشان اكشفها , انا عارف جيهان بتحب تعمل كده , رحت و فتحت الباب بسرعة و بس ملقتش حد , بس فضل صوت الخبط موجود حتي بعد ما فتحت الباب , اكتشفت ان الصوت جاي من الدولاب ! انا ساعتها استغرب ايه اللي ممكن يجيب صوت الخبط ده من داخل الدولاب ! قربت من الدولاب و بدات اتوتر لان كل ما اقرب كل ما الصوت بيعلي اكتر , بعدها فتحت باب الدولاب مرة واحدة و فجأة لقيت قطة سوداء خارجة من الدولاب بتجري من الغرفة و خرجت وراها لقيتها نطت من البلكونة , بعدها دخلت غرفتي و اخدت نفسي و شغلت نور الغرفة , و بعدها نمت لاني فعلا كنت محتاج النوم جدا و نمت نوم عميق , حلمت في اليوم ده بنفس الراجل اللي لابس لبس صعيدي و بس المختلف في المرة دي انه كان ماسك قطة سوداء في يده و برضو كان بينادي علي اسمي . .بعد حوالي شهر كنت راكب مع اصحابي في العربية و كنت سايق في وقت متأخر و كان الطريق فاضي و ضلمة , حد من صحابي قالي ازيد السرعة ف انا فعلا زيدت السرعة خصوصا ان الطريق بليل و فاضي بس فجأة لقيتني خبطت شخص و دمه غرق السيارة من الامام , خرجت بسرعة من السيارة وكنت متوتر جدا , رحت عند الشخص اللي خبطته لقيته طفل صغير حوالي 9 سنوات و كان متغرق في دمه و منظره كان بشع و فجأة لقيت واحد من صحابي نده عليا و قالي يلا بسرعة نمشي من هنا قبل ما حد يشوفنا , جريت بسرعة و سبت الطفل و رحت للعربية , واحد من صحابي هو اللي ساق لاني كنت متوتر جدا وخائف و مكنتش هعرف اسوق خالص , روحت البيت وانا متضايق جدا من اللي حصل و خايف ان ممكن يكون حد شافني ان انا اللي خبطتة و انه يبلغ عني , مبطلتش تفكير و كنت متضايق اني ازاي قتلت ؟! . معرفش ازاي بعدها نمت و في اليوم ده خلمت حلم غريب جدا , حلمت اني في الشارع اللي مات فيه الطفل و الشارع كان فاضي تماما و لمحت من بعيد شخص جالس في نصف الشارع و بيقول كلام انا مش سامعة بدأت اقرب منه و كل ما اقرب اكتر الصوت كان بيعلي اكتر , لحد ما بقت جنبه بعدين انوار الشارع كلها طفت و لقيت الشخص اللي جالس ده بدأ يقف و كان طويل جدا , بعدها الشخص ده مسك يدي و قال ليا : تعالي في مكان هناك فيه ضوء و فعلا لمحت من بعيد مكان منور وصت الظلام اللي انا فيه و بعدها بدأت امشي مع الرجل الطويل ده و كان الرجل الطويل بيتكلم بصوت خافت بس كلام انا مش فاهمة لحد ما وصلنا للمكان اللي فيه ضوء و التفتت للراجل الطويل لقيته اتحول للطفل اللي خبطته ! و بعدها قال ليا جملة واحده بس بصوت اطفال و هي " ارجع يا نور" ! صحيت مخضوض من الحلم ده و كانت
ضربات قلبي سريعة , بصيت في الساعة لقيت الساعة 6 الفجر يعني تقريبا منمتش غير ساعتين بس ! لقيت بعدها صاحبي محمود اللي كان معايا في العربية لقيتة بيتصل بيا ف رديت عليه قلتله ايوه يا مصطفي قال : الو يا نور , بص انا بعد ما روحت حاولت انظف السيارة من الدم من غير ما حد يشوفني و بعدها الفضول قتلني و كنت عايز اعرف لو في حد طلب للطفل الاسعاف او حاجة ف اخدت تاكسي عشان ممكن يكون حد شاف رقم سيارتي ف رحت عديت عالمكان اللي الطفل مات فيه و لقيت ناس كتيرة ملمومة حول الطفل و الاسعاف و البوليس موجودين و ف وقفت جنبهم و شفت الطفل متقطع بمعني الكلمة و طبعا كان ميت , بس الغريب في الموضوع ان الطفل عينه كانت بتنزل سائل اسود و الناس كلها حتي كانت مستغربة جدا من شكل الطفل و الناس كلها بيقولوا لا حول ولا قوه الا بالله و ناس تقول ياعيني اهله فين دلوقتي ؟! , انا قفلت مع محمود و انا متضايق جدا من اللي اتحكالي ده و كنت مخنوق جدا من اللي انا عملته , بعدها غلبني النوم , صحيت بعدها و عدي اليوم عادي