Notes

هاااااااااااااااااااااااااااااااااااااااام جدا للناس اللي ريحة الجيش يوم الاربعاء 23 / 10

انا دورت في الموضوع كتير جدا لغية معرفت حاجات مهمة فقولت افيدكم معايا و يا ريت لو لقيتو الموضوع مفيد ابعتو لأي حد من اصحابك اللي دخلين جيش و اكسب فيه سواب

هتلاقي هنا ::::

1- كل كل كل حاجة ممكن تحتاجها و انت رايح مركز التديب انا حاطتها (حتي اتفه الحاجات )

2- شويه ملحوظات و تحذيرات من ناس خبرة و راحو الجيش ( علشان جيشنا يعدي علي خير )

3- شرح تفصيلي لأول يوم فمركز التدريب و باقي الايام في مركز التدريب ( مهم جدا علشان متبقاش تايه و فاهم الدنيا ماشية ازاي هناك )

&&الموضوع تجميعة لأكتر من موضوع منشورين قبل كده مع بعض الزيادات&&

لو في اي استفسار
محدش يسألني
انا كل اللي اعرفو و اللي معرفوش كتبتو

أخوكم / غازي

_____________________________________________________________________________________________________________________________________________________________________________________________________________________

متطلبات مركز التدريب
(هناك اشياء اساسية يجب اخذها و اشياء متروك لك الاختيار فيها )

1. غيارات داخيلة ابيض خدلك 6 ولا حاجه ..1 كلسون عشان السقعه وده اسأل اى حد دخل الجيش هيقولك مهم جدا فى السقعة
2. شربات يفضل تكون طويلى عشان البيادة
3. قصافة بس اللى من غير سلاح يعنى مفهاش السكينه الصغيره
4. برسيل او آيريال هاتلك الباكو 700 جم
5. مكن حلاقة متجبش الماكينه اللى بيركب فيها المواس مش هتدخل بيها هات المكن العادى هاتلك 10 ولا 15 واحدة
6. معجون حلاقة و فرشة حلاقة
7. فرشاة أسنان ومعجون
8. فوطة صغيرة ويستحسن يبقى لونها ازرق سماوي او اخضر فاتح عشان ما تبانش انها مش ميري .
9. صابونتين وش + صابونة ديتول مطهرة (لاحظ انك حتبقى في الصيف والحرارة العالية والعرق حيحتاجوا نظافة جيدة جدا حتى لا تلتقط عدوى جلدية )
10. مراية مدورة صغيرة من اى حد ب 2.5ج عشان تحلق مش عشان تتسبسب
11. 3او 4 اقفال ( كمبيوتر يفضل علشان الصيني بيفتح بعضة ) مفتاح القفل الإحتياطى يكون مع زميل لك تثق فيه
12. عايز ازازة شامبو صغيرة او فرشاه شعر صغيرة هات
13. خط موبايل معاك فى مركز التدريب بدل التليفون واشحنه بعشرة ولاحاجه عشان لو لقيت حد هناك معاه تليفون تحط الخط
14. علبتين سجاير كليوباترا ولا حاجه هينفعوك حتى لو مبتشربش سجاير ..هتمشى حالك بيهم مع الصف الضباط ( بس انا بصراحة مش مقتنع بالحكاية دي !!! )
15. مرهم كينا كومب وده مفيد جدا ( تسلخات و التهابات وفطريات ) + علبة مطهر معوي عشان لو اكلت حاجة قلبتلك بطنك او عملتلك اسهال او انتفاخ وانا بنصحك بنوع اسمه فلاجيل 500 جرام حتلاقيه علبة ب 5 جنيه فيها شريطين حيظبطوا الاداء معاك
16. شبشب
17. اهم من كل اللى فات هات مصحف صغير) كتاب ربنا خير صديق ليك )
18. فلوس اقل حاجة 300 جنية في رأيي الشخصي
19. معالق
20. محفظة فيها سوستة هتساعدك ( علشان الكرنيهات و المفاتيح و الفلوس )
21. وبودرة إيفا بتاعة رائحة الجزم لإنك هتلبس البيادة من 5 صباحا إلى 9 مساءا مهمة للبيادة حترشها دايما في البيادة من جوه قبل ما تلبسها وكمان ترش شوية على رجليك
22. مزيل عرق
23. 3 فرش جزمة عشان البيادة نشفة اوي حتبوظ رجليك
24. أدوية ( للبرد – مضاد حيوي – إسهال – إمساك – بطن )
25. ورنيش اسود
26. خرطوم صغير يجى متر ( عشان هنتشطف بيه )
27. ليفة عشان تستحمه
28. شريط بلاستر صغير عشان اي جروح لا قدر الله
29. خيط و ابرة ( و يفضل يكون خيط تخين او خيط دوبارة ). خيط كاكى و خيط أبيض حتما سوف تحتاجها لخياطة ما يتمزق من ملابس خلال التدريبات
30. رباطين جزمة طوال لونهم اسود (احتياطي عشان يمكن تاخدلك بيادة من غير رباط وكل شيء وارد (
31. سجادة صلاة صغيرة
32. ساعة يد
33. زراير.
34. ورق فلوسكاب ( غالبا هتحتاجه ).
35. قلمين جاف.

____________________________________________________________________________________________________________________________________________

ملاحيظ

*حاجات كتير من الحاجات دي المفروض انك بتستلمها , زي عدة الحلاقة والفوطة والشبشب والغيارات والصابون , لكن المشكلة انه هناك احتمال الا تستلم هذه الاشياء , او تستلمها ناقصة , عشان كده الافضل انك تعمل احتياطاتك وتاخد حاجتك معاك لو سمحولك بدخولها خير وبركة مسمحوش يبقى الأمر لله , وهم على اي حال بيسمحولك بالادوات الشخصية ايا كانت وكمان بيسمحوا بالغيارات .
*الموبايلات ممنوعة تماما
*حاول متنساش الغيارات البيضا عشان حتحتاج تغير كتير وهما مش حيسلموك الا غيارين فقط ويمكن كمان تستلمهم ناقصين فوق او تحت.
*المفروض انك حتستلم فوطتين بس خدلك واحدة معاك احتياطي ويستحسن يبقى لونها ازرق سماوي او اخضر فاتح عشان ما تبانش انها مش ميري .
*ما تاخدش لبس ملكي خااااااااالص غير اللي انت حتروح بيه .
*متنساش الادوية اللي قلتلك عليها حطها مع بعضها في كيس صغير او خليها في جيبك لو خايف انها تضيع منك عشان انت حتحتاج الحاجات دي جامد خصوصا مرهم الجلدية والمطهر المعوي ومش حتلاقي الحاجات دي في عيادة المركز .
*حاول تحلق شعرك لأقص حد ممكن ويستحسن تحلقه رقم 2 بمكنة الشعر , عشان ما تضطرش تحلق جوه الوحدة .
*المية وارد جدا انها تكون شحيحة قوي وممكن تروح مراكز تدريب مفهاش مية اصلا الا ساعة واحدة في اليوم , متقلقش خالص , حتتكيف مع الوضع مهما كان .
*خد معاك فلوس بس مش كتير عشان ممكن تتعرض للسرقة ومتنساش انك حتقبض في نهاية ال 45 يوم مبلغ في حدود 150 او 200 جنيه . عشان لو التعيينات مش كويسة هتعيش عالكانتين يا معلم.
*حتلاقي كانتين في المركز عندك ممكن تشتري منه اللي انت عايزه , وانصحك لو لقيت فيه لبن (بيجيبوا اكياس كده زي بخيره ممكن تلاقيها وومكن لا) تشتريه بصفة منتظمة عشان أكل الجيش بيجيب امساك رهيب
*إنسى المعلبات .. عشان هياخدوها منك وهم بيفتشوا شنطتك.
*إصحى بدري شوية (لأ شويتين) عشان تدخل الحمام براحتك وتحلق دقنك براحتك وتغسل سنانك قبل الجماهير الغفيرة

تحذيرات:

1- فلوسك .. شرفك .. مهماتك (لما تروح هناك هتسمعها كتير) (وكمان هتسمع دي: وانت هنا مصير مش مخير .. الجيش بيقولك إتصرف)
2- طبعا أدواتك بتاعتك إنت بس (مش محتاج أقولك مكن الحلاقة والفرشة و..و..و..) وكمان الصابونة بتاعتك محدش يستعملها غيرك.
3- برضو القصافة .. حذاري (بتنقل فطريات وبكتيريا وأمراض دم والعياذ بالله)
4- تاني مرة أقولك على دوا البرد (هتحتاجه جدا هناك)
5- خد الدنيا هناك بسهولة.. (متعصلجش) .. ومتضايقش نفسك من صول أقل منك علميا أو ظابط واخد قلم في نفسه ..
....لكن لو حسيت بتعب جامد أو ألم شديد(ربنا يحفظك ويبعد عنك كل سوء) يعني (مثلا ألم شديد في الضهر أثناء الجري) متدوسش على نفسك .. محدش هينفعك لو حصللك حاجة.....
.... خليك ذكي ومتجهدش نفسك جامد .. يعني(حاول تنظم تنفسك أثناء الجري .. وأثناء الخطوة العسكرية متدبش رجلك جامد في الأرض .. إيه مبتعرفش تمثل!!)....

6- متنساش الصلاة .. حتى ولو عالأسفلت .. ولو بتيمم ... (هتعينك وتريحك من البيحصل فيك)

____________________________________________________________________________________________________________________________________________

الموضوع ده انا لقيته في منتدى الديفيدي فور عرب فقولت انقله بالنص عشان هو مهم ومسلي لكن كل المعلومات اللي فيه انا ناقلها بس لكن مش كاتبها

اول يوم فى مركز التدريب :

بدون تعيين يعني مفيش أكل هتاخده, هتعرف مكان الكانتين اليوم ده على طول, بس ممكن تصعبو عليهم و يدخلوكو الميس, الميس هو محل آكل الجنود.
المهم اليوم بيبدأ ازاي, انت بتروح المكان الي هيئولولك عليه لما تسمع سلاحك, هتيجي المكان ده الصبح, هتستنى شوية, بس شوية كتير يعني زي ما اتعودت منهم, هيجي الاول ظابط, و الظابط رتبة رفيعة اودام الجنود, هيبتدي يدي محاضرة على الواقف الجيش عامل ازاي, و هيقولك ان اهم حاجة تلاتة: شرفك, مهماتك, فلوسك, و المهمات هي المخلة او شنطة الهدوم العسكرية بتاعتك.

هيخلص من الكلام, هيقولك روحو اشترو شنطة و يشاور على كانتين وراكم كده هيكون فيه مستلزمات هتحتاجها جوة مركز التدريب, بالذات المعالق و الاقفال, في الاقفال بالذات اوعى تقرب من القفل الي لونه رمادي, لان ده القفل الصيني, القفل ده مفاتيحه بتفتح على بعضها, فخلي بالك و خليك ناصح و اشتري القفل الذهبي, او انزل رمسيس و اسئل عن القفل الكمبيوتر, معروف و حلو و قوي.

في عسكري هيجي يبتدي ينادي على الاسامي, و كل واحد يقول آفندم او ايوة يديله الكارنيه العسكري بتاعه, عليه تاريخ الاصدار و ينتهي في, و دي تواريخ مش كله زي بعضه, انت ممكن تكون سنة في غيرك سنتين تلاتة, المهم الكارنيه ده بتاعك و اوعى يضيع منك لحد ما يخلص جيشك, هات محفظة فيها سوستة, هتساعدك.

- بعديها بربع ساعة او نص, هيجي المندوب بتاعك, هينادي على الاسامي و يقول اسمك و يقول انت هتروح مركز التدريب الفلاني

- ربع ساعة او نص ساعة كمان و هتبتدو تشكلو طابور حسب مركز التدريب و عليه هتتشكل اول طابور الزامي في جيشك علشان تركب المركبات العسكرية "الاتوفيس المعفن" الي مفتوح من كل حتة, تحس انه كان طيارة قبل كده و قلب اتوبيس لدواعي امنية او هو طيارة بس عامل عبيط, جيش بئا.

- هتركب الاتوبيس, ابئا هات معاك آكل للرحلة دي, اي سوايل او عصاير, عشان الطريق ممكن يكون طويل, حسب مركز التدريب يعني.

- هتوصل مركز التدريب, هتنزل و تتشكل طابور, المندوب هيدخل و هتدخلو وراه و تبتدو تدخلو المركز و هتعضوا على الارض تحت المظلة.

- هييجي بتاع الآمن و يقولكو "الي معاه موبايل يطلعو بالزوء, الي معاه شريحة يقول, علشان الي مخبيه هنكسر الموبايل بتاعه اودام عينه", في ناس كتير هتجيب ورا و تطلع الموبايل, انت اعمل زكي و ما تجبهوش معاك اصلا, بس الي تجيبه هو شريحة خط, و تكون شاحنه بـ 100 جنيه, عشان لما تدخل جوة هتلاقي ناس مهربة موبايلات, شوية شوية هتلائي نفسك بتئولهم انك عايز تعمل مكالمة, فا مش هتحرج لان الشريحة معاك و الرصيد يا هندسة.

- المهم عسكرية الآمن هيقولك ايه, انكو هتخشو على مكتب الامن و الاجهزة هتشوف كل حاجة معاك و هيحسسك انك مسافر ابوظبي, و في الاخر هتطلع مفرزة الامن دي انهم بيفتشوك بايديهم عادي جدا, يعني ما تخافش اوي, هما بس بيتكلمو كتير عشان يخضوك و تترعب, اصله اول يوم ليك في الجيش دنتا لقطة, بس خليك كووول و هادي و كويس انك ئريت الكلام ده عشان تبئا انت الوحيد الي فاهم وسط الي حواليك.

- بعد ما يخلص تفتيش, الي معاه موبايل و سلمه من الاول هيحطه في ظرف و هتستلمه لما تخلص مركز تدريب و الي طلع موبايل او شريحة و هو بيفتشك هيكسره اودامك
- هتستنو شوية بعد كده هيجيب الحلاق, الي شعره طويل هيحلق له اودامكم, بعد كده كله هيكون جاهز انه يستلم المهمات.

- دلوئتي هتروح تستلم مهامتك, هتاخد المخلة و تلم حاجاتك, غيارات بيضة, ملكش دعوة بيها, 2 فوطة, 2 افارول مموه, افارول زيتي صيفي, افارول زيتي شتوي, شورت مموه, تي شيرت عسكري, تي شيرت اخضر, بيادة, كوتشي, جزمة نص "او خمسة خرم", كاب مموه, كاب زيتي, 4 اجواز شرابات زيتي عسكرية, آيش "حزام عسكري", كيس مخدة, ملاية, بيجامة صيفي, بيجامة شتوي, 3 بطاطين.

- هيدور على عنبر فيه مكان فاضي تعضو فيه كلكو و الزيادة تروح عنبر تاني, كل واحد هيدخل هيشوف سرير فاضي فياخده, هتلاقي دولاب على شمالك, تبتدي تطلع الي في الشنطة و المخلة و تبتدي ترتب لو في وقت, لو الساعة جت 10 بالليل, مش هتلحق غير انك تتطلع البيجامة و تلبسها و القفل الذهبي بتاعك علشان تقفل المخلة و تحطها جوة الدولاب و تقفل الدولاب و تنام و ترتاح من اليوم الفظيع ده, و بكده يكون انتهى اطول يوم في العسكرية, عشان بس اول يوم.

اي يوم في مركز التدريب من المعتاد انه يكون كالآتي:

- تصحى الساعة 4 و نص
- الساعة 5 تروح تفطر في الميس
- الساعة 6 صفارة الاستعداد لطابور الصبح
- 6 و نص تنزل الطابور ادام مساعد السرية "الشاويش الي ماسك السرية"
- 7 تخش ارض الطابور
- صفا و انتباه و تعليمات اثناء الطابور
- كل المخالفات في اليوم الي قبله يتنووه عليها في طابور الصبح
- هيجي عسكري كل يوم يقول المعنوي, آية, حديث نبوي, و خبر من جريدة القوات المسلحة آخر عدد
- بيطلع شاويش وراه الاوامر, و الاوامر هي اسم القائد منوب و الظباط النبطشيات
- بعد ما يخلصو, هتقول حاجة اسمها نشيد الجيش, مع الايام هتحفظو
- بعد كده هتبتدي تجهز التشكيلات عشان تبتدي تمارين اللياقة, هتجروا حوالين ارض الطابور, تعملوا شوية تمارين و بخ على الساعة 9, هتروح العنبر تريح شوية

- الساعة 9 و نص تنزل للطابور التاني و هو طابور التعليم الاولي, او اسمه طابور الكفار زي ما بنسميه, الطابور ده بيعض 4 ساعات في الشمس, يعني فيه وقفة كتير و صفا و انتباه, و الحدث الي فيه ان الشاويش بتاعك هيجي يعلمكو شوية حاجات عسكرية, مرة ازاي تفك السلاح, مرة يقولك ازاي تمشي الخطوة العسكرية, يعني طابور تعليم اولي بيبئا كده كل مرة.

- تيجي الساعة 2, تبتدي تجهز التشكيلات علشان يدور الطابور على الميس للغداء
- تخلص الغداء تروح العنبر تموت شوية من التعب على السرير كده
- الساعة 4 و نص تنزل طابور الهتاف, يجمعكو الشاويش
- الساعة 5 تخش ارض الطابور, الطابور ده ابسط طابور, هتقف لحد الساعة 5 و نص او 6 بالكتير, صفا و انتباه و شوية تعليمات بعد كده تحيو العلم و تمشو.
- الساعة 7 العشاء, في الاول لازم تروح بعد كده هتعرف السكة و مش هتروح, ملوش لازمة, هتلاقي نفسك بتروح الكانتين و هتتعود على الاكل بتاعهم.

- بعد العشا لحد الساعة 10 هتعض فاضي, في ناس بتنام, في ناس بتئرا حاجة, في ناس بتعض تلعب مع بعضها, ناس تانية يطلعو السجاير و يدخنو و يتكلمو ف اي حاجة, يعني الحياة بتبئا كول بعد الساعة 6, بعد اسبوع هتبتدي تحفظ اسماء صحابك الجداد.
- الساعة 10 النور يطفي, لازم راسك تكون على المخدة, و تنام عشان تصحى ليوم جديد.