Notes

في الحقيقة لما هاجي أتكلم عن السنة كلها بنظرتي ليها دلوقتي فهي أكتر سنة تخبّظتْ فيها في حياتي ، و اتغيرت بسببها حاجات كتيرة إما في دماغي أو حتى نظرتي للأمور.

أول السنة كنت داخلة مصدومة شوية من النظام الجديد و من التجمع الكبير جدا من ناس عمري ما شفتها في حياتي قبل كدة. الناس اللي كانوا بيسموهم " دفعة" على الأغلب كلهم هيكملوا معاك السبع أو الست سنين الجايين من حياتك.

فكرة إنك مُطالب بالتعامل الكويس و أقل التخبيطات دي عبيطة جدا ، مفيش حد هيقدر بأي حال يكون بيرفكت في أي وقت ، أو حتى إنه يخلي سنة أولى دي كدة.

لازم هتحس نفسك أول يوم إنك جيت مكان غلط ، و ممكن دماغك تحاصرك في فكرة " أنا عملت كدة في نفسي ليه". ده ملهوش أي معنى غير إنك ماشي صح ، معناه إنك من أول يوم بدأت تعرف أخطاء و تتجنبها و دي حاجة كويسة جدا - و مش ممكن تحس إنها كويسة فعلا إلا لما تبقى مكاني - .

الدنيا ملخبطة ، مش عارف أعمل حاجة أو مش فاهم حاجة أصلا ، الترجمة صعبة أوي ، مش فاهم حاجة من المحاضرات. مش هاحضر محاضرات تاني و هحضر سكاشن بس، إيه ده النادي بفلوس؟ ، اومال زمان كانوا بيدخلوا الطلبة ازاي ، يا جماعة ابن سينا بعيدة جدا :( ، الأناتومي حلو اوي ، ايييييه داااا الامتياز من 86%؟ ، مين العبيط ده اللي ميجيبش 86 ، مش هترجم من القاموس تانى ، أنا مجبتش القاموس أصلا ، لما تخلص المحاضرة صحيني ، المدرج ده مش آدمي فين العميد يخوانا ، مش عارف همتحن شفوي ازاي والله - و مكناش امتحننا ولا خدنا حاجة نمتحن عليها اصلا - ، سامح دوس ولا نور الدين ، يا عم مش هتلاقي نور الدين، هات سامح - و مش هتفتحه أصلا- ، الهستو ماله كدة؟ - مع الوقت و المنهج هتعرف بالظبط ماله 😂 - ، مش هذاكر دلوقتي بقي الكلية أخف و شكلها سهلة و تنام يعني - أكبر خدعة عملها الشيطان في ناس كتير جدا من كل الدفعات ، البايو حلو - هتندم عالكلمة دي - ، مفيش لايلولايلولايلولالالا .-. ، الجروب ده مبيسكتشيييييي ، مش أي حد يقولك تعال املا الأبلكيشن تبقى ميمبر معاه ، اسأل و قارن و ادخل الحتة اللي تحبها بس حاول تبقى فعال فيها و ده ميجيش على دراستك ، فاكس بقى المحاضرة دي يا جماعة ، تعالوا نروح القاعة بقى :'D ، إيه ده أنا كنت فاكر القاعة عاملة زي مسجد أو مكتبة كدة و مناطق خضراء واسعة و مناظر طبيعية خلابة ، معلش القاعة حلوة و هتخلينا نذاكر غصب عننا ، متتخانقوش مع بتوع سنة ساتة عشان هما أولى منكم بيها ، إيه ده مال الجامعة صغرت ليه كدة؟ - هي كانت كبيرة و حضرتك تايه ليس إلا - ، متحاولش تعمل حاجات تظهر بيها نفسك زيادة عن اللزوم علشان بتبقى فيك و متحسسش الناس انك غتت و تقفلهم منك من قبل ما يتعاملوا معاك ، و متتخانقوش متتخانقوش ، و لا اتخانقوا الحوار بيبقى مسلي :D ، بس متخلوش الخلافات العبيطة دي تخسركم بعض ، يلا يا جماعة نلعب أي حاجة المحاضرة مملة جدا ، محدش بيحضر بايو يلا ، اوبا امتحان عملي اناتومي ، اوبا نظري بايو مافتحتوش خالص. ايه القرف اللي قدامي ده ، احفظه ازاي ده! ، العملي متذاكرلوش نظري بس متبقاش حمار زيي ، دكتور يدخل أول محاضرة يقولك أنا هشرح حاجات مش مكتوبة و هجيب امتحانات من الفضاء الخارجي ، مشش صحيح بس احضروا و ركزوا :'D.
آه عادي المادة الواحدة بيدخل لكل برانش دكتور عاادي ، مش هتشرحوا حد لأ ، المشرحة متخوفش على قد ماهي مقرفة يعني ، مش لازم تحضر لغة و حاسب يعني بس احضر كام محاضرة كدة عشان تفهم الدنيا ، مش كل الكتب اللي يتقال عليها تتجاب خليك منطقي ، مفيش كتب خارجية في البايو هتنفع اوي يعني ، الكلية محتاجة منك شوية تعب أكتر من كدة :'D

طبعا الكلام ده كله لما يقراه حد من أولى هيعتبره ألغاز جدا، بس كل فترة هيفتكر جزء من الكلام ده و يضحك لأنه غالبا هيلاقيه بالنص متكرر معاه.

الخلاصة كلها ، في كام نقطة لازم تعرفها كويس جدا كشخص هيبقى مكاننا دلوقتي و هيكتب بردو للأجيال اللي وراه.

(1) حاول قدر الإمكان تحافظ على نفسك و شخصيتك ، متسيبش الكلية تبعدك عن حاجة بتحب تعملها أو عن صحابك في الكليات التانية.

(2) حاول قدر الإمكان تبقى مميز بس مش زياط.

(3) لو انت مش شخص اجتماعي بطبعك أو مبتتعودش بسرعة عالناس متجبرش نفسك تعمل ده ، ولو اجتماعي بس بتحس إنك متضايق من تجمعات الناس الزيادة متزودش اجتماعيتك دي لأ لازم تحددها، عالأقل علشان ترتاح على المدى البعيد و متحسش إن في حاجةضاغطاك و عاملة أزمة تتعبك بعدين.

(4) متمشيش ورا كلام اي حد كدة و متصاحبش كل الناس ، خلي علاقاتك مريحة ليك وطبيعية.

(5) اعرف خبرات كتيرة و استفيد لأقصى درجة بس بردو اخلق لنفسك عادة تريحك عشان ببساطة محدش هيعرف اللي يريحك فعلا غير نفسك.

(6) حاول متشتريش أكل من الجامعة كتير عشان متتعبش.

(7) متشربش بيبسي كتير لأ.

(8) متقعدش عالنت كتير حتى لو محدث إنترنت * اللي هوا اول مرة يعرف النت السنادي يعني * عشان والله ما ليها فايدة و بيضيع.

(9) متشتتش نفسك في حوار الداتا والتسجيلات و الحوارات دي كلها، الموضوع ببساطة شديدة :
* لو هتسمع تسجيل يبقى لازم يكونَ معاك نفس الورق اللي بيشرح منه الدكتور ، لو متوفرش ده جرب لو لقيت نفسك تعبان من ده متكملش.
* لو هتشوف شرح لازم تذاكر الأول أو حتى تقرا الموضوع علشان تعرف تحدد الزيادات.
(10) لما تجيب أقلام هستو هات أقلام جيلسي و ريح دماغك بجد من اولها.

(11) البالطو يا دكاترة ._.

(12) متدخلش نفسك في حوارات و خليك برنس في نفسك.

(13) اوعي تفكر تقرا بوست بالمنظر ده تاني في حياتك.

ربنا معاكم ، نوّرتوا ^^