Notes

უცხო ქვეყნებში აცრილი ჩვენი ქვეყნის მოქალაქეების ვაქცინაციის აღიარება ძალიან მარტივად ხდება"

ჯანდაცვის მინისტრის მოადგილის თამარ გაბუნიას განცხადებით, უცხო ქვეყნებში აცრილი საქართველოს მოქალაქეების ვაქცინაციის აღიარებისთვის პირმა გარკვეული პროცედურები უნდა გაიაროს. ამის შესახებ თამარ გაბუნიამ BM.GE-ის კითხვის საპასუხოდ განაცხადა, რომელიც უცხო ქვეყნიდან ჩამოსული ვაქცინირებული საქართველოს მოქალაქეების ადგილობრივ სისტემაში ასახვას და იმ ბენეფიტების მიღებას ეხებოდა, რითაც აცრილები ქვეყანაში სარგებლობენ.

„უცხო ქვეყნებში აცრილი ჩვენი ქვეყნის მოქალაქეების ვაქცინაციის აღიარება ძალიან მარტივად ხდება იმ ცნობის საფუძველზე, რომელიც მათ ჩამოტანილი აქვთ და ამ ცნობაში მითითებულია მათ მიერ პირველი დოზის ჩატარების საკითხი. ეს პირველივე დღიდან მოქმედებს ქვეყანაში. ამ ცნობით მათ უნდა მიმართონ დაავადებათა კონტროლის ცენტრს და მოხდება მისი ასახვა სისტემაში და შემდეგ ჩაიტარებს მეორე დოზას, ამასთან დაკავშირებით პრობლემა არავის შეჰქმნია. შესაძლოა პროცედურული საკითხების გავლაა საჭირო, მაგრამ ეს მექანიზმი ძალიან მარტივად მოქმედებს“, - განმარტა თამარ გაბუნიამ.

ვის ეკუთვნის რევაქცინაცია?

პირველ რიგში, უნდა აღინიშნოს, რომ რევაქცინაციის დროს, საქართველოს ხელისუფლების გადაწყვეტილებით, გამოყენებული იქნება მხოლოდ ამერიკული წარმოების კოვიდვაქცინა „ფაიზერი“.

ეს გადაწყვეტილება საქართველოს მთავრობამ მას შემდეგ მიიღო, რაც ჩინური წარმოების ვაქცინებით, „სინოფარმითა“ და „სინოვაკით“ აცრილ საქართველოს მოქალაქეებს, საზღვარგარეთ მგზავრობისას პრობლემები შეექმნათ, რაკიღა ევროპული ქვეყნების უმეტესობისთვის, ჩინური წარმოების ვაქცინით იმუნიზაცია ე.წ. კოვიდსაშვს არ წარმოადგენს.

ამიტომ 7 ოქტომბერს გადაწყდა, რომ „სინოფარმითა“ და „სინოვაკით“ აცრილი საქართველოს მოქალაქეები, პირველადი ვაქცინაციიდან 28 დღის თავზე, რევაქცინაციას „ფაიზერით“ შეძლებენ. რევაქცინაცია გულისხმობს „ფაიზერის“ არა ერთი, როგორც ბუსტერის შემთხვევაში, არამედ სრული, ორი დოზის მიღებას.

ჯანდაცვის მინისტრის 11 ოქტომბრის ბრძანებაში ვკითხულობთ:

„ორი დოზით აცრილ პირებს, რომლებსაც მოგზაურობის, სწავლის, მკურნალობის ან სხვა მიზნით, საზღვარგარეთ წასვლისთვის ესაჭიროებათ ვაქცინაციის ჩატარება, დამატებით შესაძლებელია ჩაუტარდეთ Pfizer–BioNTech ვაქცინის ორი დოზით აცრა, ამასთან მეორე დოზას და დამატებით პირველ დოზას შორის მინიმალური ინტერვალი შეადგენს 28 დღეს“.