Notes

السلام عليكم
بطبيعتها الناس تحب الشي المضحك واللي أحيانا يكون تهكمي، أو حتى تكون نكت ممكن ما يفهمها إلا لاعبين للعبة معينة (إنسايد جوك بمعنى ثاني). ممكن هذي النكت بشكل عام واجهتها في ألعاب كثير متنوعة، الأغلبية لعب ميتل جير سوليد الأولى، وواجه سايكو مانتس بطريقته المختلفة! في البداية يطلع لك التخزينات الموجودات في الذاكرة (أيام الميموري الكارد وال1 ميجا اللي كانت أكثر من كافية)، بعدها عاد تقتله عادي أو تسوي حركة تبديل مكان اليد المشهورة! بشكل عام ميتل جير مليانة جدا من هالأشياء *ذا إيند*

طيب كل هذي الأمور واللي ممكن نحسبها تقليدية وش سالفتها؟ خلنا في البداية نبدأ بتعريف بسيط لمصطلحين أعتقد المعظم عارفينهم (سواء لاعبين الفيديو جيمز أو مشاهدين الأفلام والمسلسلات أو أي سوفتوير كان). المصطلحين هم الإيستر إيجز والبوب-كالشتر. في عدد من الناس ما يعرفون الفرق بين هالشيئين، خصوصا بالنسبة للاعبي الفيديو جيمز بعضهم دمجها كلها تحت مسمى إيستر إيجز.
طيب بنبدأ بتعريف بسيط للإثنين، الإيستر إيجز.....لغةً هي بيوض عيد الفصح... إصطلاحاً نقدر نقول إنها شي مخفي في لعبة/فلم (مثل سالفة البيض في عاد الفصح). عموما هذا الشي المخفي يكون إشارة أو ريفرنس لشيء آخر، مثل يطلع لك اسم المطورين بشكل أو بآخر.. مثلا في لعبة كرونو تريجر لو قدرت تدخل غرفة سرية بعد ما تنهي اللعبة فراح تلتقي بشخصيات تُمثل مطوري اللعبة، أحد هذي الشخصيات بيقول لك: Congrats on finishing the game. now get a life!!


أما البوب كالتشر (أو البوبيلار كالتشر) فهي إشارة لمينستريم موجود أو كالتشر موجودة أو منتج موجود (مثل لعبة فيها ريفرنس للعبة ثانية). يعني هذا أحد الأمثلة السريعة *AC2: It's a-me, Mario!*

طيب الكلام السابق نقدر نلخصه بشكل سريع، البوب-كالتشر والإيستر إيجز يتفقون في إن كلاهما نكات لأشياء موجودة، وهذي النكتة ما تؤثر على مجرى اللعبة وقصتها غالبا وإنما هي مجرد إضافة تعطي جو للعبة.. طيب يختلفون في إيش؟ الإيستر إيجز من اسمها تكون مخفية، بمعنى ثاني إن مشيت بقصة اللعبة مثل ما هي مطلوبة فما راح تواجهها، مو مثل البوب-كالتشر واللي غالبا تكون مكشوفة. هذا طبعا من قسمناها من ناحية الفيديو جيمز!
يشتركون في، ويختلفون في.. ما تؤثر فيها نكتة

موضوع الفيديو ما بيركز على إيش هم كثر ما بيركز على بعض الأشياء (أو الإيستر إيجز) واللي اعتبرها عبقرية أو مضحكة بنفس الوقت. في البداية بأبدأ بإيستر إيجز بالنسبة لي هو المفضل من هذي الناحية. البعض فيكم أكيد سمع بشي اسمه "توتاكاز سونق"، على اسم مستخدمها كويزومي توتاكا *...*.. توتاكا هو أحد الكومبوزرز (ملحني الألعاب)، فكرته كانت عبقرية (أو عبيطة بنفس الوقت)، فتقريبا جميع الألعاب اللي اشتغل عليها توتاكا (كملحن، بما إنه مؤدي صوت يوشي بعد)، عموما جميع هذي الألعاب وضع فيها مقطع معزوفة موسيقية بسيطة من 19 نوتة، ما كان يضع هذا اللحن بشكل واضح ولا يبينه. فمثلا في لعبة سوبر ماريو لاند 2، اخسر كل حياتاتك.. حيواتك.. عموما اخسرهم كلهم وانتظر لعدة دقائق على شاشة الجيم أوفر وبيختفي اللحن الحالي وبيطلع لحن جديد! أو في لعبة لويجيز مانشن، في شاشة الكونترولرز انتظر ل3 دقائق ونصف وبيطلع لك نفس الموسيقى! الغريب إنه ما تم إكتشاف كل الموسيقى في الألعاب اللي اشتغل عليها توتاكا فما ندري هل هي موجودة وما تم اكتشافها أو مو موجودة أصلا! عموما في فيديو لجيم إكسبلين متعلق بهالموضوع بشكل أكبر لو مهتم.

أيضا في لعبة هاف لايف الأولى، لو سويت خطوات معينة منها بتدخلك لغرفة كلها عبارة عن أوجه رئيس شركة فالف، جيب نيويل، وهو مبتسم بشكل... كريبي! في فيديو في الديسكريبشن بيعلمك الخطوات لو محتاجها.

أو حتى وجود شخصيات حقيقية شهيرة في لعبة معينة، مثلاً في أحد المهمات في هيلو 4 راح تلقى جنديين، إن وقفت قدامهم راح تلاحظ المحادثة العبيطة الكوميدية بينهم! الجنديين كانوا كونان أوبراين تي في هوست مشهور وآندي ريكتر اللي معاه دايما في برنامجه، الحلو فريق التطوير أعطاهم حرية "السواليف" براحتهم بما إن الإثنين فاصلين مع بعض. عموما كان لهم حلقة فيها وصفوا طريقة تسجيلهم للأصوات

عموما في ألعاب صار توجهها هالشي إنها تكثر من الشيئين اللي تكلمنا عنهم سابقا. أهم هذي الألعاب هي جواكيمالي واللي حتى الميمز حطتها في ألعابهم! بمعنى ثاني ما بقوا شي إلا وكان له ريفرنس في اللعبة. وما ننسى جودة اللعبة الممتازة بعد فلو كنت جيمر ومتعود فطبيعي تلعبها وأنت قاعد تضحك. في ألعاب كثير من هالنوع كذلك مثل اللعبة الحشيش مونكي آيلاند *نيفر باي مور ذان 20 باكس فور آ فيديو جيم*

في بعض الحالات، الإيستر إيجز ممكن تكبر ويكون قائم عليها أشياء عديدة. مثلا لعبة جست كوز2، إذا كنت تقود أحد الطيارات فوق البحر ففي عندك فرصة إنك تجد جزيرة مهجورة، إذا سقت فوقها راح تتفجر الطيارة وشخصيتك بتنط منها عشان تطيح في هالجزيرة وتبدأ حياة جديدة! الغريب والجدير بالذكر هنا إن هذا الجزيرة ما هي إلا محاكاة للجزيرة اللي ظهرت في مسلسل لوست بمعظم التفاصيل اللي كانت فيها!

طيب بنتكلم عن وجود أهمية وجود الإيستر إيجز والريفرنسز. أكيد وجودها ما بيؤثر على سير اللعبة، بس بنفس الوقت كإضافات فهي بشكل عام جميلة وتعطي طابع للعبة أحياناً. ولو إنه تبين الستيريوتايبس والآراء أكثر ولكن بشكل عام بعض "النكت" خلنا نسميها تكون حلوة في مكانها غالبا وحقيقة لازم تكون مناسبة لطبيعة اللعبة. خصوصا نلاحظ إن الألعاب المليانة محتوى غالبا تكثر فيها الإيستر إيجز، والألعاب اللي يكون فيها حس كوميدي ومحادثات كوميدية فيكثرون الريفرنسز. لكن هل صار الإستخدام مبالغ فيه؟ أقصد ممكن توصل لمرحلة تصير شيء أساسي في الألعاب لأن اللي كان يخليها "تضحك" هو ندرتها وإنها حركة جديدة غير مسبوقة! في هالحالة المطورين صراحة لو بيحطون حركات اعتيادية بيكون الريفرنس أو الإيستر إيج شي مكرر. فلازم المطور يحاول إنها تنعرض بشكل عبقري حتى لو ما فهمها الكل.

طيب في نقطة أخيرة بيكون فيها نقاش، نفرض إنك مطور ألعاب وحطيت إيستر إيج في لعبتك، وهذا الإيستر إيج كان صعب إن أي شخص يلقاه. فهل تفضل إنك بعد فترة تكشفها للناس مثل ما صار لمطورين لعبة باتمان أركام أسايلم واللي كان فيها إيستر إيج تدخل منطقة فيها دلائل على وجود سيكول للعبة، ولا بتسكت عنها حتى أي شخص يكتشفها أو تبقى شي مجهول للأبد! على فكرة، لعبة فيديو ويزبول اللي صدرت عام 1978 كان فيها أقدم إيستر إيج معروف في الألعاب، واللي هو وجود اسم عائلة المطور. الغريب هنا إن هذا الإيستر إيج ما أُكتشف إلا عام 2004 بعد صدور اللعبة ب16 سنة! فهل ممكن في ألعاب أقدم كان فيها وللآن ما أُكتشف؟

عموما، اللي ما شاف الحلقتين السابقات.....

وكالعادة،
@ExtraMHD
محمد العويد
مع السلامة