Notes

ژرف نگاہ ۔۔۔ شبیر حسین اِمام
نااِنصافی کی اِنتہاء
’’بابا آپ کی ترقی کب ہو گی؟‘‘ سرکاری ملازم کے جوانسال بیٹے (سیکنڈ ائر کے طالبعلم) نے اپنے والد سے استفسار کیا تو کمرے کی فضا اچانک سنجیدگی سے بھر گئی اور بڑی دیر تک خاموشی رہی۔ اِن دنوں اَخبارات میں سرکاری ملازمین کی محکمانہ ترقیوں (اپ گریڈ) سے متعلق خبریں تواتر سے شائع ہو رہی ہیں اور اس پر اظہار اطمینان اور تشکر پر مبنی بیانات کا شمار بھی ممکن نہیں لیکن خیبرپختونخوا ہی میں سرکاری ملازمین کی ایک تعداد ایسی بھی ہے‘ جو گذشتہ کئی دہائیوں سے ’محکمانہ ترقی‘ جیسی نعمت سے محروم اور حالیہ ترقی پانے والے اپنے ہی ساتھیوں سے نظریں نہیں ملا پارہی‘ حالانکہ اُنہیں شودر سمجھنے والوں کے لئے کوئی ایسی دلیل بھی نہیں جسے قانون کی رو سے درست قرار دیاجا سکے۔
خیبرپختونخوا میں ’آئی ٹی کیڈر‘ سے تعلق رکھنے والے سرکاری ملازمین کے شدید ذہنی دباؤ اور مایوسی کا قوئ جواز موجود ہے کیونکہ ملازمت کے روز اوّل سے بارہ گریڈ میں بھرتی ہونے والے اِسی گریڈ میں ریٹائر ہو جائیں تو اُن کی وابستگی اور خدمات کا معاوضہ ملا بھی تو کیا ملا۔ آئی کیڈر سے تعلق رکھنے والے سرکاری ملازمین کا جائز شکوہ ہے کہ اُن سے ارباب اختیار (افسرشاہی اور سیاسی حکمراں) سوتیلی ماں جیسا امتیازی سلوک روا رکھے ہوئے ہیں کیونکہ ایک تو اُن کا ملازمتی ڈھانچہ موجود نہیں جسے تشکیل اور بہتر بنانے کی کسی کو فکر نہیں اور دوسرا جب محکمانہ ترقی کا مجوزہ طریقہ کار ہی وضع نہیں کیا گیا تو اَزخود ہر سال گریڈ و تنخواہ میں اِضافہ کس طرح ممکن ہے۔ یادش بخیر خیبرپختونخوا کے سبھی سرکاری محکموں میں ’کمپیوٹر آپریٹر کیڈر‘ کے ملازمین موجود ہیں حتیٰ کہ وزیراعلیٰ ہاؤس اور گورنر ہاؤس جیسے کلیدی دفاتر میں بھی اِن کی خدمات کے بغیر روزمرہ کی فائل ورک مکمل نہیں ہوسکتا۔ ریکارڈ کیپنگ سے خط و کتابت‘ تقاریر‘ معمولات کی سرگرمیوں سے متعلق پریس ریلیز اور اہم بیانات کا اِجرأ ایک وقت تھا‘ جب ہاتھ سے لکھے ہوئے مکتوبات بذریعہ دستی یا ڈاک اِرسال کئے جاتے تھے‘ گھنٹوں کا کام دنوں‘ ہفتوں اور مہینوں میں مکمل نہیں ہوپاتا تھا اور بسااوقات مکتوبات آنے جانے کے عمل ہی میں کھوجاتے لیکن اَب یہی کام ’کمپیوٹر آپریٹر‘ کر رہا ہوتا ہے اور اپنی حیثیت میں ایک سے زیادہ خدمات بیک وقت سراَنجام دے رہا ہوتا ہے‘ جس کی حوصلہ اَفزائی یا اُس کی خدمات کا اِعتراف کرتے ہوئے خاطرخواہ محکمانہ ترقی نہیں دی جاتی۔ مجموعی طور پر چترال سے ڈیرہ اِسماعیل خان تک کم و بیش 1200 کمپیوٹر آپریٹرز کی فریاد ہے کہ اُنہیں اُن کا جائز حق دیا جائے اور اِس سلسلے میں اُنہوں نے پشاور کی عدالت عالیہ سے بھی رجوع کیا‘ جہاں دو سال طویل سماعت کے بعد اُن کا مؤقف درست تسلیم کر لیا گیا لیکن صوبائی حکومت نے پشاور ہائی کورٹ کی بات ماننے کی بجائے سپرئم کورٹ سے رجوع کر لیا جہاں سماعت میں مزید کئی برس لگ سکتے ہیں اور اس عرصے میں بہت سے ’کمپویٹر آپریٹر‘ ریٹائرڈ ہو جائیں گے۔ چونکہ ہمارے ہاں انصاف فوری نہیں اور نہ ہی سستا ہے‘ اِس لئے کمپیوٹر آپریٹروں کے چہروں پر اُمید کی بشاشت دکھائی نہیں دیتی۔ سپرئم کورٹ میں اب تک ملازمین پندرہ لاکھ روپے خرچ کر چکے ہیں۔ ملازمین نے جب وزیراعلیٰ خیبرپختونخوا سے ملاقات کی تو انہوں نے یہ کہتے ہوئے معاونت کرنے سے معذرت کر لی کہ ’’چونکہ یہ مقدمہ سپرئم کورٹ میں زیراِلتوأ ہے‘ اِس لئے وہ اس بارے میں کچھ نہیں کر سکتے۔‘‘ آخر کیا امر مانع ہے کہ ’پشاور ہائی کورٹ‘ کا فیصلہ تسلیم نہ کرنے اور سپرئم کورٹ سے رجوع کرنے والی صوبائی حکومت اِس مرحلے پر مقدمہ واپس لے کر ’آئی ٹی کیڈر‘ والے ملازمین کو اُن کا جائز حق نہیں دے سکتی؟
حکومت کی جانب سے بطور ’کمپیوٹر آپریٹر‘ بھرتی ہونے کے لئے تعلیم کی کم اَز کم سطح ’بی سی ایس‘ یا ’بی اے‘ کے ساتھ ’کمپیوٹر سائنس میں ڈپلومہ‘ مقرر ہے جس پر بھرتی ہونے والوں کو 12واں گریڈ دیا جاتا ہے جبکہ دیگر صوبوں میں تعلیم کے اِسی مساوی معیار پر 16 گریڈ میں ملازم بھرتی کئے جاتے ہیں۔ مبنی برانصاف نہیں کہ یکساں تعلیمی معیار کے باوجود خیبرپختونخوا میں سرکاری ملازمین کو کم درجے اور مراعات دی جارہی ہیں! اگر بارہ اور سولہ گریڈ کے سرکاری ملازمین کی تنخواہ میں موازنہ کیاجائے تو یہ دس سے بارہ ہزار روپے ماہانہ کا فرق بنتا ہے‘ جو معمولی نہیں۔’اِنفارمیشن ٹیکنالوجی سٹاف ایسوسی ایشن‘ اَپنا جائز حق حاصل کرنے کے لئے دائر مقدمے کی پیروی میں لاکھوں روپے خرچ کر چکی ہے‘جس کی پائی پائی ملازمین اپنی تنخواہوں سے اَدا کرتے ہیں اُور مقابلہ صوبائی حکومت کے لامحدود مالی وسائل سے ہے۔ اگر سرکاری ملازمین کی کارکردگی ایک جیسی ہی ہے‘ اگر اُن کی کارکردگی کی جانچ کا کوئی معیار مقرر نہیں اور اگر سزا و جزأ کا تصور محکمانہ ترقی سے جوڑنے کا کوئی قاعدہ موجود نہیں تو پھر کسی ایک ’کیڈر‘ والوں کے ساتھ ناانصافی کی اِنتہاء کیوں؟
۔۔۔۔۔۔۔۔۔